Ali Məhkəmə ata-anasını döyən şəxslə bağlı qərarını elan edib

Ali Məhkəmədə ata və anasını döyərək hədələyən Natiq Piriyevin barəsində olan məhkəmə qərarından verilən kassasiya şikayətinə baxılıb. Avtosfer.az-ın "Report"a istinadən xəbərinə görə, hakim Gülzar Rzayevanın sədrliyi ilə keçirilən prosesdə qərar elan olunub.

Qərara əsasən, N.Piriyevin kassasiya şikayəti təmin edilməyib.

İttiham aktına əsasən, əvvəllər məhkum edilmiş N.Piriyev Bakıda dəfələrlə atası Qulu Piriyev və anası Kəmalə Piriyevanı döyüb, onlara hədə-qorxu gələrək yaşadıqları evi satmalarını, ona pul vermələrini tələb edib.

O, Bakı Ağır Cinayətlər Məhkəməsinin hökmü ilə 6 il müddətinə azadlıqdan məhrum olunub. Hökmdən narazı qalan N.Piriyev apellyasiya şikayəti verib. Bakı Apellyasiya Məhkəməsi isə şikayəti təmin etməyib. O, daha sonra kassasiya şikayəti ilə Ali Məhkəməyə müraciət edib.