Avtobus zolağında sərnişin mindirib-düşürəndə nəyə diqqət edilməlidir? - EKSPERT

Paytaxtda avtobus zolaqlarının sayı artdıqca taksi sürücülərinin bu zolaqlardan istifadə qaydaları ilə bağlı suallar da çoxalır. Xüsusilə sərnişini mindirmək və düşürmək üçün avtobus zolağına daxil olmağın qanuni olub-olmaması sürücüləri maraqlandırır.

Avtosfer.az xəbər verir ki, məsələyə nəqliyyat eksperti Eldəniz Cəfərli sosial şəbəkə hesabında paylaşım edərək münasibət bildirib. O qeyd edib ki, avtobus zolaqları ictimai nəqliyyatın maneəsiz hərəkətini təmin etmək üçün nəzərdə tutulub və bu zolaqlarla hərəkət etmək, eləcə də orada dayanmaq ümumi qaydada qadağandır:

"Bu tələbin pozulmasına görə inzibati məsuliyyət nəzərdə tutulur. qanunvericilikdə müəyyən istisna da mövcuddur. Belə ki, “Yol hərəkəti haqqında” Qanunun 48-ci maddəsinə əsasən, sürücü yolun nişanlanması buna imkan verdiyi halda, yəni 1.11 nömrəli qırıq-qırıq xətt vasitəsilə avtobus zolağına daxil ola bilər. Avtobus zolağı ilə hərəkət etmək, orada dayanmaq qadağandır və buna görə cərimə tətbiq edilir. Ancaq “Yol hərəkəti haqqında” Qanunun 48-ci maddəsi sürücüyə icazə verir ki, o, 1.11 nömrəli qırıq-qırıq xətt vasitəsilə avtobus zolağına daxil olsun, yolun sağ hissəsində sərnişini mindirib və ya endirsin, daha sonra isə qarşıdakı qırıq-qırıq xətt vasitəsilə avtobus zolağını tərk etsin. Bu icazə avtobus zolağından hərəkət zolağı kimi istifadə etmək anlamına gəlmir. Sürücü yalnız sərnişinin minib-düşməsi məqsədilə qısa müddət ərzində avtobus zolağına daxil ola və həmin əməliyyatı başa vurduqdan sonra zolağı dərhal tərk etməlidir. Bu qaydalara əməl olunması həm ictimai nəqliyyatın maneəsiz hərəkəti, həm də yol hərəkətinin təhlükəsizliyi baxımından vacibdir".

Fatimə