“Avtomobil Yolları” Məqsədli Büdcə Fondunun vəsaiti 200 milyon manatdan aşağı düşüb

Bu il yanvarın 1-nə “Avtomobil Yolları” Məqsədli Büdcə Fondunun vəsaitinin qalığı 196 milyon manat təşkil edib ki, bu da ötən il yanvarın 1-nə nisbətən 21,5 % azdır.

Avtosfer.az bu barədə "2024-cü il dövlət büdcəsinin icrası haqqında" qanun layihəsinə istinadən xəbər verir.

Məlumata görə, ötən il Fondunun gəlirləri 330 milyon manat proqnoza qarşı icra 506,4 milyon manat və yaxud 176,4 milyon manat (1,5 dəfə) çox olub. Ümumi daxilolmalarda yol vergisi 135,9 milyon manat, mülkiyyətində və ya istifadəsində olan avtonəqliyyat vasitələri ilə sərnişin və yük daşımaları həyata keçirən hüquqi və fiziki şəxslər tərəfindən ödənilmiş sadələşdirilmiş vergi 5,7 milyon manat, idxal olunan minik avtomobillərinə və avtonəqliyyat vasitələrinə tətbiq edilən aksiz və gömrük rüsumu 324,1 milyon manat, dövlət rüsumu üzrə isə 40,7 milyon manat təşkil edib.

Hesabat ilində Fondunun xərcləri 560 milyon manat təşkil edib. Bu vəsaitin 230 milyon manatı işğaldan azad olunmuş ərazilərin yenidən qurulmasına və bərpasına, 330 milyon manatı isə ölkənin digər ərazilərində ümumi istifadədə olan respublika və yerli əhəmiyyətli avtomobil yollarının və onlarla əlaqədar mühəndis qurğularının, təhkim zolaqlarının istifadəsinə, saxlanılmasına və istismarına yönəldilib.