Avtomobildən külli miqdarda narkotik aşkarlanıb - FOTO

Biləsuvar rayon Polis şöbəsinin əməkdaşlarının keçirdikləri növbəti uğurlu əməliyyat tədbirləri nəticəsində 9 kiloqramdan artıq narkotik vasitə aşkarlanaraq qanunsuz dövriyyədən çıxarılıb.

DİN-in Mətbuat xidmətindən Avtosfer.az-a verilən məlumata görə, Biləsuvar rayon Polis şöbəsinin (RPŞ) əməkdaşları tərəfindən rayonun Yuxarı Ağalı kəndi ərazisində narkotik vasitələrin qanunsuz dövriyyəsində şübhəli bilinən Bakı şəhər sakinləri - Pərviz Hüseynov və əvvəllər məhkum olunmuş Rəşad Xalıqov saxlanılıb. Saxlanılarkən P.Hüseynovun idarə etdiyi “Lada Priora” markalı avtomobilə baxış keçirilən zaman oradan 8 kiloqram 485 qram narkotik maddə tiryək və 620 qram qurudulmuş marixuana aşkar edilərək götürülüb.

Faktla bağlı Biləsuvar RPŞ-nin istintaq bölməsində cinayət işi başlanılıb, araşdırma aparılır.