Aylardır bağlı qalan bu yol nə vaxt açılacaq - DYP-dən CAVAB

Xəbər verdiyimiz kimi "Formula 1" Azərbaycan Qran-prisinin keçirilməsi ilə əlaqədar olaraq aprelin 22-dən Bakının mərkəzi küçələrində nəqliyyatın hərəkəti məhdudlaşdırılır. Bu o deməkdir ki, Bakıda bir çox küçə və prospektlərində sıxlıq yaşanacaq. O cümlədən Neftçilər prospektinin bağlı olması vəziyyəti daha da ağırlaşdıra bilər. Doğrudur Lökbatan dairəsindən nəqliyyatın hərəkəti dairəvi yol istiqamətində yönləndiriləcək. Amma müəyyən problemlərin yaşanacaği gözləniləndir.

Odur kı, Badamdar qəsəbəsində baş vermiş sürüşmə ilə əlaqədar olaraq Badamdar yolunun bağlanması vəziyyəti daha da acınacaqlı hala gətirib. Artıq bir neçə aydır ki, həmin yolda nəqliyyatın hərəkəti məhdudlaşdırılıb. Bu isə o deməkdir ki, alternativ yol kimi ordan istifadə edən sürücülər çox əziyyət çəkəcək.

Avtosfer.az məsələnin araşdırılması üçün Bakı şəhər İcra Hakimiyyətinə müraciət edib. Oradan bildiriblər ki, hazırda həmin ərazidə təhlükə qaldığı üçün nəqliyyat vasitələrinin o yoldan istifadəsinə icazə verilməsi nəzərdə tutulmur. Bakı Şəhər Dövlət Yol Polisi İdarəsindən isə bildirilib ki, məsələ araşdırılacaq, əgər müvafiq komissiya yolun açılmasına müsbət rəy versə o zaman həmin ərazidə avtomobillərin hərəkətinə icazə verilə bilər. Bütün bunlar isə aprelin 22-nə qədər öz həllini tapacaq. 

Qeyd edək ki, həmin yol alternativ yol kimi çox böyük əhəmiyyət kəsb edir. Mərkəzi küçələrində hərəkət məhdudlaşdırıldıqda sürücülərin burdan istifadəsi zəruri hal ola bilər.

Orxan Əli