Azərbaycanın strateji rolu artır: Orta Dəhlizlə Böyük Britaniyaya yeni marşrut

Qazaxıstan Transxəzər Beynəlxalq Nəqliyyat Marşrutu (Orta Dəhliz) üzərindən Böyük Britaniyaya yeni ixrac marşrutunu istifadəyə verib.

Avtosfer.az xəbər verir ki, bu barədə nəqliyyat eksperti Rauf Ağamirzəyev məlumat verib.

Ekspertin sözlərinə görə, Ekibastuz şəhərindən yola salınan mineral gübrələr dəmir yolu və dəniz nəqliyyatının kombinasiyası ilə Qazaxıstan–Xəzər dənizi–Azərbaycan–Gürcüstan marşrutu üzrə daşınır. Yüklər daha sonra Poti və Batumi limanları vasitəsilə Böyük Britaniyanın Felikstou limanına çatdırılır.

Rauf Ağamirzəyev bildirib ki, bu daşınma Orta Dəhlizin artıq təkcə regional nəqliyyat marşrutu olmadığını, eyni zamanda Avropa bazarlarına çıxış üçün strateji logistika dəhlizinə çevrildiyini bir daha nümayiş etdirir.

Azərbaycanın bu marşrutun əsas tranzit halqalarından biri olması ölkənin beynəlxalq yükdaşımalar sistemində rolunu daha da gücləndirir. Tranzit yüklərinin həcminin artması isə ölkəyə həm iqtisadi, həm də logistika baxımından əlavə üstünlüklər qazandırır. Marşrutların şaxələndirilməsi, çatdırılma müddətlərinin optimallaşdırılması və multimodal daşımaların genişləndirilməsi Orta Dəhlizin rəqabət qabiliyyətini artıran əsas amillərdəndir. Ekspert vurğulayıb ki, bu proses beynəlxalq ticarət əlaqələrinin inkişafına, yük axınlarının daha etibarlı və çevik şəkildə təşkilinə, həmçinin region ölkələri arasında iqtisadi əməkdaşlığın möhkəmlənməsinə mühüm töhfə verir.

Eltac Zülfüqaroğlu