Bakıda adam bıçaqlayan şəxsin məhkəməsi başlayıb

Bakı Ağır Cinayətlər Məhkəməsində qəsdən sağlamlığa ağır zərər yetirmədə təqsirləndirilən Anar Hacıyevin cinayət işi üzrə məhkəmə iclası başlayıb. Avtosfer.az-ın "Report"a istinadən xəbərinə görə, hakim Samir Əliyevin sədrliyi ilə keçirilən prosesdə təqsirləndirilən şəxsin anket məlumatları dəqiqləşdirilib.

Məhkəmənin baxış iclası fevralın 27-nə təyin edilib.

Qeyd edək ki, hadisə ötən ilin oktyabr ayında Xətai rayonunda baş verib. Rayonun 7-ci Əhmədli küçəsi, ev 21-də yaşayan, 1992-ci il təvəllüdlü Nurullayev Rafiq Yusif oğlu naməlum şəxs tərəfindən döş qəfəsinin sol hissəsindən bıçaqlanıb.

Yaralı Sabunçu rayon 3 saylı Şəhər Klinik Xəstəxanasına çatdırılıb. R.Nurullayev sol döş qəfəsində kəsilmiş-deşilmiş yaralarla təcili əməliyyata alınıb, onun həyatını xilas etmək mümkün olub.

Polis əməkdaşlarının araşdırması zamanı R.Nurullayevi bıçaqlamaqda şübhəli bilinən A.Hacıyev saxlanılıb.

Ona Cinayət Məcəlləsinin 126.1-ci (qəsdən sağlamlığa ağır xəsarət yetirmə) maddəsilə ittiham irəli sürülüb.