Bakıda ağırtonlajlı maşınlar evlərə ziyan vurur - VİDEO

Bakıda ağırtonlajlı avtomobillərin dar küçədən keçməsi sakinlərin evlərinə ziyan vurur. Avtosfer.az-ın xezerxeber.az-a istinadən məlumatına görə, bunu paytaxtın Binəqədi rayonu Mədən-2, korpus-73 ünvanında yaşayan sakinlər iddia edir. Onların sözlərinə görə 10 gündür ki, ərazidə olan zavodlara və saxlama anbarlarına gedən yük avtomobilləri onların evlərində çatlar əmələ gətirib. Bu səbəbdən də sakinlər yolu bağlayaraq yük avtomobillərinin onların küçəsindən keçməsinə mane olurlar. İş o yerə çatıb ki, ərazidə yaşayanlar iri avtomobillərə görə uşaqlarını küçəyə çıxmağa qoymurlar. Əlacsız qalan sakinlər problemlə bağlı dəfələrə həmin müəssisələrin rəhbərlərinə irad bildiriblər. Məsələ ilə bağlı həmin müəssisələrin rəhbərləri bildirdilər ki, onların yük avtomobilləri əvvəllər neft mədənlərinin arasındakı yolla gəlirmiş. Son 10-15 gündə "Binəqədi Oil" şirkətinin əməkdaşları həmin yolu bağlayıblar. Sahibkar bildirir ki, onların avtomobilləri neft buruqlarına heç bir maneə yaratmırdı. "Binəqədi Oil" şirkətindən bildirilib ki, neftin ərazisində qanunsuz tikililərin qarşısını almaq məqsədi ilə ərazi bağlanıb. Və bu tam qanuna uyğundur.