Bakıda hansı yollarda məhdudiyyət olacaq? - Əyani şəkildə görün - VİDEO

Mayın  29-da Bakı Olimpiya Stadionunda keçiriləcək futbol üzrə UEFA Avropa Liqası turnirinin final oyunu ilə bağlı bəzi küçə və prospektlərdə hərəkət istiqaməti dəyişdiriləcək. Avtosfer.az Bakı Şəhər Dövlət Yol Polisi İdarəsi ilə birgə bu barədə videoçarx hazırlayıb. Videoda hansı küçələrdə istiqamətin dəyişəcəyi əyani şəkildə göstərilir. Həmçinin Daxili İşlər Nazirliyinin Baş Dövlət Yol Polisi İdarəsi vətəndaşlara müraciət edib.Müraciətdə qeyd olunur ki, ölkəmiz son zamanlar bir çox mötəbər idman yarışlarına və digər beynəlxalq tədbirlərə ev sahibliyi edib: “Qeyd olunan tədbirlər vətəndaşların və ayrı-ayrı əlaqədar dövlət qurumlarının birgə fəaliyyəti nəticəsində yüksək səviyyədə təşkil olunaraq keçirilib. 

Əvvəlki illərdə olduğu kimi, hesab edirik ki, 2019-cu il may ayının 29-da Bakı Olimpiya Stadionunda keçirilməsi nəzərdə tutulan futbol üzrə UEFA Avropa Liqası turnirinin final oyunu da yüksək səviyyədə keçiriləcək. Bununla əlaqədar, Baş Dövlət Yol Polisi İdarəsi diqqətinizə çatdırır ki, sözügedən tədbir ərəfəsində paytaxtın Üzeyir Hacıbəyov, Füzuli və Şəmsi Bədəlbəyli küçələrində azarkeşlərin və ölkəmizə gələn digər xarici qonaqların təhlükəsiz, rahat və fasiləsiz hərəkət etmələri üçün həmin ərazilərdə mayın 29-da nəqliyyatın hərəkəti qismən məhdudlaşdırılacaq. Bu baxımdan, paytaxt sakinlərindən həmin tarixdə şəxsi nəqliyyat vasitələrindən deyil, ictimai nəqliyyatdan isitifadə etmələri xahiş olunur”.

Orxan Əli