Bakıda Qurani-Kərimə bənzər qutuda spirtli içki istehsal edilir? – İDDİA - VİDEO

Azərbaycanda çəkildiyi iddia olunan bəzi görüntülər sosial şəbəkələrdə geniş müzakirələrə səbəb olub.

Avtosfer.az xəbər verir ki, paylaşılan kadrlarda müqəddəs Qurani-Kərim kitabına bənzər şəkildə hazırlanmış qutunun içərisində spirtli içki satıldığı iddia olunur.

İddialara görə, üz qabığı müqəddəs kitaba oxşadılan bu məhsulun içərisində yüksək keyfiyyətli içki yerləşdirilib və qiyməti təxminən 2000 manat civarındadır. Sosial şəbəkə istifadəçiləri bu görüntüləri qınaqla qarşılayaraq, bu cür məhsulun dini dəyərlərə hörmətsizlik kimi qiymətləndirildiyini bildiriblər.

Hazırda görüntülərin harada və kim tərəfindən çəkildiyi dəqiq məlum deyil.

Hadisə dini dəyərlərin kommersiya məqsədilə istismarına dair ictimai narazılığı yenidən gündəmə gətirib. Sosial şəbəkələrdə istifadəçilər bu cür halların qarşısının alınması üçün nəzarət mexanizmlərinin gücləndirilməsini tələb edirlər.

Eltac Zülfüqaroğlu