Bakının bu küçələrində hərəkət məhdudlaşdırıldı: Yeni qaydalar necə olacaq? – VİDEO

Bakının tarixi mərkəzində yerləşən bir sıra küçələrdə avtomobillərin hərəkətinə məhdudiyyət tətbiq edilib. Yeni qaydaya əsasən, həmin küçələr hər gün saat 07:00-dan gecə saat 00:00-dək nəqliyyat vasitələrinin hərəkəti üçün bağlı olacaq.

Avtosfer.az xəbər verir ki, nəqliyyat eksperti Anar Əliyev bu qərarı şərh edərək bildirib ki, sözügedən küçələrin həftəsonları bağlanmasına hələ 2024-cü ildən başlanılıb. Məqsəd şəhər sakinləri və turistlər üçün rahat piyada mühiti yaratmaq, insanların burada sərbəst gəzməsinə və istirahət etməsinə şərait yaratmaqdır.

Ekspertin sözlərinə görə, ərazidə yaşayan sakinlərin avtomobillə evlərinə daxil olması və nəqliyyat vasitələrini saxlaması üçün xüsusi icazələr və parklanma talonları nəzərdə tutulub. Təcili tibbi yardım və digər operativ xidmətlərin əraziyə girişinə də imkan yaradılacaq.

Ərazidə fəaliyyət göstərən bəzi müəssisələrin avtomobilləri üçün də müvafiq şərait yaradılıb. Mərkəzi Klinikanın nəqliyyat vasitələrinə bu baxımdan məhdudiyyət tətbiq edilmir. Yüklərin çatdırılması və boşaldılması üçün isə saat 07:00-dan 10:00-dək vaxt ayrılıb.

Məhdudiyyətlər ətraf küçələrin hamısını əhatə etmir. Qonşu küçələrdə avtomobillərin hərəkəti və parklanma qaydaları əvvəlki kimi qalır. Bağlı ərazidə insanların hərəkətini asanlaşdırmaq üçün kiçik ölçülü, pulsuz fəaliyyət göstərən elektrik avtobuslarından da istifadə olunur.

Anar Əliyevin fikrincə, qərarın əsas məqsədi yalnız nəqliyyatın hərəkətini məhdudlaşdırmaq və parklanma problemini həll etmək deyil, həm də Bakının tarixi-memarlıq irsini qorumaq və şəhər sakinləri üçün daha cəlbedici ictimai məkan yaratmaqdır.

Ərazidə keçmiş Birinci Bankın binası, Hacı Zeynalabdin Tağıyevin yaşadığı binada yerləşən Azərbaycan Milli Tarix Muzeyi və digər tarixi tikililər mövcuddur. Bu baxımdan, həmin küçələrin avtomobil yollarından daha çox insanların rahat vaxt keçirə biləcəyi ictimai məkanlar kimi təşkili məqsədəuyğun hesab olunur.

Ekspert ərazidə nəqliyyat səs-küyünün xeyli azaldığını da diqqətə çatdırıb.

Onun sözlərinə görə, bəzi küçələrdə asfalt və daş örtüklərin birləşdiyi hissələr, sədlər və ayrı-ayrı panduslar mövcuddur. Gələcəkdə ərazinin yenidən qurulması və piyadalar üçün vahid, maneəsiz mühitin yaradılması mümkün ola bilər.

Eltac Zülfüqaroğlu