Bakının yollarında təmir: Məqsəd tıxacın qarşısını almaqdır - Ekspert

"Bakının hal-hazırda 100-ə yaxın küçəsində təmir işləri gedir. Və bu təmir işləri indi, bəlkə də, son illərdə ilk dəfədir ki, dərs ili başlamamış həyata keçirilir. Əvvəllər Azərbaycan Avtomobil Yolları Dövlət Agentliyinin keçmiş rəhbərliyinin vaxtında, avqust ayında bir iş görmürdülər. Dərs başlayanda o da başlayırdı yolları təmir eləməyə, aləm dəyirdi bir-birinə. İndi bu yeni rəhbərliyin yanaşması bir az fərqlidir. Dərs ili başlayana qədər bu işləri bitirmək istəyirlər ki, yollarda hərəkətin intensivliyi nəzərə alınaraq sıxlıq, tıxac yaranmasın".

Bu fikirləri nəqliyyat eksperti Elməddin Muradlı paytaxtda aparılan yol təmiri işlərindən, eləcə də Biləcəri enişi hissəsinin təmir işləri ilə əlaqədar bağlanmasından danışarkən səsləndirdi.

"Biləcəri enişi bir az nəqliyyatın yükünü çox götürən bir ərazidir. Amma hər bir halda aidiyyəti qurumlar yəqin ki, bunu tənzimləyəcəklər. Əvvəldən məlumat verilir, elanlar paylaşılır ki, sürücülər də buna uyğun davransınlar. İndi son dövrlər bu cür yolların təmiri qısamüddətli və sürətli aparılır. Ümid eləyirik ki, çox da ağır bir fəsad verməyəcək. Amma ümumiyyətlə yollar təmir olunmalıdır", - deyə o əlavə etdi./redaktor.az