Banka saxta dollar satmaq istəyən çinlilərin şikayəti təmin edilməyib

Bakı Apellyasiya Məhkəməsində saxta pul kəsməkdə təqsirləndirilən Zhejanq Zin, Meng Lin Çen və Rusiya Federasiyası, Dağıstan Respublikasının vətəndaşı Rəsulov Məhəmmədrəsul Muxtaroviçin barəsində olan hökmdən verilən apellyasiya şikayəti üzrə məhkəmə iclası başa çatıb. Avtosfer.az-ın “Report”a istinadən xəbərinə görə, hakim Vaqif Mursaqulovun sədrliyi ilə keçirilən prosesdə qərar elan olunub.

Qərara əsasən, təqsirləndirilən şəxslərin apellyasiya şikayəti təmin edilməyib, birinci instansiya məhkəməsinin çıxardığı hökm dəyişdirilmədən qüvvədə saxlanılıb.

Qeyd edək ki, həmin şəxslər Yasamal rayonu Şərifzadə küçəsində yerləşən “Rabitə Bank”ın “Yasamal” filialında külli miqdarda - 18 min 900 saxta ABŞ dolları dəyişmək istəyərkən tutulublar.

Onlar maddi subut ilə birgə saxlanılaraq polis idarəsinə təhvil veriliblər.

Hər üç şəxsə qarşı Cinayət Məcəlləsinin 204-cü (saxta pul və ya qiymətli kağızlar hazırlama, əldə etmə və ya satma) maddəsi ilə ittiham irəli sürülüb.

Bakı Ağır Cinayətlər Məhkəməsinin hökmü ilə onların hər biri 8 il müddətinə azadlıqdan məhrum edilib.