Beynəlxalq Bankın Şamaxı filialının sabiq baş xəzinadarı bəraət alıb

"Azərbaycan Beynəlxalq Bankı" ASC-nin Şamaxı filialının mənimsəmədə təqsirləndirilən sabiq baş xəzinadarı Kifayət Səmədova barəsində bəraət hökmü çıxarılıb. Avtosfer.az xəbər verir ki, bu barədə "Report"a vəkil Vüqar Babayev məlumat verib.

Onun sözlərinə görə, Sumqayıt Apellyasiya Məhkəməsində keçirilən iclasda hüquqlarını müdafiə etdiyi şəxs barəsində bəraət hökmü çıxarılıb.

Hökmdən narazı qalan prokurorluq kassasiya protesti verib. Ali Məhkəmə isə kassasiya protestini təmin etməyib.

Qeyd edək ki, "Azərbaycan Beynəlxalq Bankı" ASC-nin Şamaxı filialının direktoru olmuş Əlisultan Məmmədov Cinayət Məcəlləsinin 179.3.2-ci (mənimsəmə, külli miqdarda törədildikdə) və 308.2-ci (vəzifə səlahiyyətlərindən sui-istifadə) maddələri ilə ittiham edilib. Bankın Şamaxı filialının sabiq baş xəzinadarı K.Səmədova isə Cinayət Məcəlləsinin mənimsəmə maddəsi ilə ittiham olunub.

Bakı Ağır Cinayətlər Məhkəməsinin hökmü ilə Ə.Məmmədov 7 il müddətinə azadlıqdan məhrum edilib. O, məhkəmə zalında həbs olunub.