“Bizim ölkəmizdə könüllü sığorta yox dərəcəsindədir” - Ərşad Hüseynov

"Dünənki yanğınla bağlı sığorta haqqında daha çox danışılır. Gəlin, bir həqiqəti bir daha xatırlayaq: bizim ölkəmizdə könüllü sığorta yox dərəcəsindədir. Sığorta şirkətləri icbari sığortaların və qanunda "könüllü" kimi nəzərdə tutulsa da, əslində məcburi olan sığortaların (məsələn, girov və ya lizinq predmetinin sığortası və s.) hesabına mövcuddur".

Avtosfer.az xəbər verir ki, bu barədə hüquqşünas Ərşad Hüseynov öz "Facebook" səhifəsində paylaşım edib. O bildirib ki, vəziyyəti ilk növbədə sığorta şirkətləri özləri və bu sahədə dövlət idarəçiliyini həyata keçirən qurumlar dəyişməlidir. "Sığorta xidmətini elə real və mükəmməl etmək lazımdır ki, sahibkar işə başlamazdan əvvəl ilkin addımlar sırasında sığorta müqaviləsini bağlamağı da unutmasın. Məsələn, dünənki kimi hadisə inkişaf etmiş sığorta bazarı olan ölkədə olanda, sahibkar nəinki malı üçün göz yaşı tökərdi, hətta yaxına gəlib zəhərli tüstünü də udmaq istəməzdi" - Hüseynov vurğulayıb.

Qeyd edək ki, martın 26-da Bakının Nizami rayonu, Qara Qarayev prospektinin 8-ci kilometr adlanan ərazisindəki “Diqlas” Ticarət Mərkəzində yanğın baş verib. Yanğında 12 nəfər xəsarət alıb.

Namiq