Çingiz Qənizadə seçiciləri dinlədi - FOTO

Milli Məclisin deputatı Çingiz Qənizadə 80 saylı İmişli- Beyləqan seçki dairəsinə daxil olan İmişli rayonunun Şahverdilər və Göbəktala kəndlərində seçiciləri ilə görüş keçirib.

Modern.az xəbər verir ki, deputat Şahverdilər və Göbəktala kəndlərində  seçicilərlə ümumi problemlərin müzakirəsini aparıb.

Deputatla görüş zamanı seçicilər Şahverdilər kəndində yerləşən müair tipli yeni inşa olunmuş kənd məktəbinin qazlaşdırılması məsələsini  gündəmə gətiriblər. Araşdırma zamanı məlum olub ki, qazın çəkilməsi üzrə texniki şərt hazırdır. Çox az miqdarda, yəni  680 manat rüsum ödəməklə bu məsələni həll etmək mümkündür. Bundan ötrü Regional Təhsil İdarəsinin həmin pulu ayırması kifayətdir.  Sakinlər məktəbin qazlaşdırılması məsələsi ilə yanaşı, kəndin sağ və sol hissəsini birləşdirən, məktəbə daxil olmaq üçün avtomobil yolundan keçid zolağının qoyulmasını da xahiş ediblər.

Eyni zamanda,  Göbəktala kənd sakinlərinin də deputatdan bir neçə xahişi olub. Belə ki, Göbəktala kənd məktəbi  olduqca pis vəziyyətdədir. Təxminən 1937-40-cı illərdə tikilmiş məktəbdir. Adıçəkilən kəndin sakinləri Təhsil Nazirliyindən yeni məktəbin tikintisi ilə bağlı deputatın məsələ qaldırmasını diqqətə çatdırıblar

Digər məsələ Göbəktala və Şahverdilər kəndinin daxilində yolların çəkilməsi ilə bağlı olub. Demək olar ki, Şahverdilər kəndi ərazisində 30-40-% yollar çəkilsə də iş yarımçıq qalıb. Göbəktala kəndində isə yolların çəkilməsi prosesi ləngiyir. Bu məsələlərin də müvafiq qurumlar qarşısında qaldırılmasını xahiş ediblər.

Daha sonra Göbəktala və Şahverdilər kəndlərinin  sakinləri,  qaz sayğaclarına müdaxilə adı altında qaz idarələri tərəfindən vətəndaşlara cərimələrin tətbiqinin baş verdiyini bildirərək  narahatlıqlarını qeyd ediblər.

Cənab prezidentin  3 aylıq müşavirənin yekununa həsr edilmiş tədbirdə  “Azəriqaz” İstehsalat Birliyinə ciddi tapşırıqlar verməsinə baxmayaraq, vətəndaşlara qarşı süni maneələrin  yaradıldığı xüsusi vurğulanıb.  Bu prosesin  hələ də davam etdiyi söylənilib.

Sonda deputat vətəndaşları fərdi qaydada qəbul edib və hər  bir şikayəti araşdıracağına, maksimum imkanı daxilində kömək edəcəyinə və problemlərin aidiyyatı qurumlar qarşısında qaldıracağına söz verib.