Çingiz Qənizadə seçicilərini dinlədi

Milli Məclisin deputatı Çingiz Qənizadə 80 saylı İmişli- Beyləqan seçki dairəsinə daxil olan İmişli rayonunun Qaravəlli- Mirili kəndlərində seçiciləri ilə görüşüb.

Modern.az xəbər verir ki, deputatla görüş zamanı seçicilər Qaravəlli   kənd məktəbinin bərbad vəziyyətdə olduğunu qeyd ediblər.

Mirili kəndinin sakinləri isə tam orta məktəbdə  istilik qızdırıcılarının tamamilə çürüyüb sıradan çıxdığını bildiriblər. Sakinlərin sözlərinə görə, istilik qızdırıcılarının 74-dən 34-ü tam sıradan çıxıb.

Seçicilər Çingiz Qənizadədən növbəti dərs ilinə qədər bu qızdırıcıların dəyişdirilməsi və istilik qazanxanasında sıradan çıxmış nasosların bərpa olunmasını xahiş edib.

Daha sonra parlament üzvü, görüş zamanı ölkədəki ictimai-siyasi durum, cənab prezidentin son aylarda atdığı addımlar, Dağlıq Qarabağ məsələsi barədə fikir mübadiləsi aparıb.

Çingiz Qənizadə kənd sakinlərinin kəndlərlə bağlı ümumi problemlərini dinlədikdən sonra hər bir müraciətlə bağlı aidiyyatı qurumlara məlumat verəcəyini bildirib və sakinləri fərdi qaydada qəbul edərək şikayətlərini qeyd edib.

Sonda deputat hər bir şikayəti araşdıracağına, maksimum imkanı daxilində kömək edəcəyinə söz verib.