Çuxurlarla dolu yollar Lökbatan sakinlərini cana yığıb - VİDEO

Paytaxtın Qaradağ rayonu, Lökbatan qəsəbəsi, Bilal Niftəliyev küçəsində yolun asfalt örtüyü yararsız vəziyyətə düşüb.

Bu barədə Avtosfer.az-a müraciət edən sakinlərdən biri ərazidəki vəziyyəti əks etdirən videogörüntü təqdim edib. Kadrlardan görünür ki, sözügedən küçədə asfalt örtüyü ciddi şəkildə aşınıb, yolun müxtəlif hissələrində dərin çuxurlar əmələ gəlib.

Şikayətçinin sözlərinə görə, problem təkcə bir hissə ilə məhdudlaşmır, demək olar ki, küçənin böyük hissəsində eyni mənzərə müşahidə olunur. Bu isə ərazidən istifadə edən sürücülərin hərəkətini çətinləşdirir, avtomobillərin texniki vəziyyətinə mənfi təsir göstərir və maddi zərərə səbəb olur.

İzləyici bildirib ki, oxşar vəziyyət Lökbatan qəsəbəsinin digər küçələrində də müşahidə edilir.

Sakinlər problemin aradan qaldırılması və yolların təmir olunması üçün aidiyyəti qurumların məsələni nəzarətə götürməsini gözləyirlər.

Nərmin