Daşkəsən sakinini döyüb pulunu alan şəxslər saxlanılıb

Daşkəsən rayon sakinini Bakıda kirayədə qaldığı evdə döyərək pulunu alan şəxslər saxlanılıblar. Daxili İşlər Nazirliyinin mətbuat xidmətindən Avtosfer.az-a verilən məlumata görə, hadisə Bakının Nəsimi rayonu ərazisində qeydə alınıb.

Belə ki, paytaxtda kirayədə yaşayan Daşkəsən rayon sakini N.Tağıyev Nəsimi Rayon Polis İdarəsinin 20-ci Polis Bölməsinə müraciət edərək martın 8-də evinə gəlmiş 3 nəfər tərəfindən döyüldüyünü, 1900 manat pulunun və avtomobilinin açarının alındığını bildirib.

Müraciətlə əlaqədar müvafiq araşdırma aparılıb. Nəsimi Rayon Polis İdarəsi 20-ci Polis Bölməsi və Gəncə Şəhər Baş Polis İdarəsi əməkdaşlarının birgə keçirdikləri əməliyyat-axtarış tədbirləri nəticəsində quldurluğu törətməkdə sübhəli bilinən Gəncə şəhər sakini R.Məmmədov və Samux rayon sakini, əvvəllər məhkum olunmuş E.Həsənli Gəncə ərazisində müəyyən edilərək saxlanılıblar.

Araşdırma aparılır.