Deputat seçicilərinin şikayətlərini dinlədi

Milli Məclisin deputatı Çingiz Qənizadə 80 saylı İmişli- Beyləqan seçki dairəsinə daxil olan İmişli rayonunun Əliqulular  kəndində seçiciləri ilə görüşüb.

Modern.az xəbər verir ki, deputatla görüş zamanı  Əliqulular kəndinin seçiciləri tibb məntəqəsinin olmamasından şikayət ediblər. Eyni zamanda, kənd məktəbinin təmirə ehtiyacı olması ilə bağlı fikirlərini bildirərək Təhsil Nazirliyinə bu barədə məlumat verilməsini qeyd ediblər. Məktəbin idman zalının  olmadığını söyləyərək müəyyən idman ləvazimatlarına da ehtiyac olduğunu bildiriblər.   

Daha sonra parlament üzvü, görüş zamanı ölkədəki ictimai-siyasi durum, cənab prezidentin son aylarda atdığı addımlar, Dağlıq Qarabağ məsələsi barədə fikir mübadiləsi aparıb.

Çingiz Qənizadə kənd sakinlərinin kəndlə bağlı ümumi problemlərini dinlədikdən sonra hər bir müraciətlə bağlı aidiyyatı qurumlara məlumat verəcəyini bildirib və sakinləri fərdi qaydada qəbul edərək şikayətlərini qeyd edib.

Sonda deputat hər bir şikayəti araşdıracağına, maksimum imkanı daxilində kömək edəcəyinə söz verib.