Dini təhsil GÜNDƏMDƏ: Qanunu pozanlar üçün sərt cərimə RƏQƏMLƏRİ

Azərbaycanda müvafiq dövlət orqanı ilə razılaşdırmadan vətəndaşların xarici ölkələrin dini tədris müəssisələrinə göndərilməsi və dini sahədə tələbə, müəllim və mütəxəssis mübadiləsinin aparılması 25 min manatadək cərimə ilə nəticələnə bilər.

Avtosfer.az xəbər verir ki, bu cür qanun pozuntularına görə inzibati xətanın bilavasitə obyekti olmuş ədəbiyyat nümunələri, mal və məmulatlar, eləcə də materiallar müsadirə edilir.

Belə hallara görə vətəndaşlar 2 000 manatdan 2 500 manatadək cərimələnirlər.

Qanun pozuntusuna yol verən vəzifəli şəxslər üçün cərimə 8 000 manatdan 9 000 manatadək müəyyən edilib.

Hüquqi şəxslər isə 20 000 manatdan 25 000 manatadək cərimə edilə bilərlər.

Qanunvericiliyə görə, müvafiq razılaşdırma olmadan xarici ölkələrin dini tədris müəssisələrinə vətəndaşların təhsil almaq üçün göndərilməsi ilə yanaşı, həmin müəssisələrin tələbə və müəllimlərinin, eləcə də din xadimləri və mütəxəssislərinin mübadiləsi də inzibati məsuliyyət yaradır.

Bu qaydanı pozan əcnəbilər və vətəndaşlığı olmayan şəxslər 2 000 manatdan 2 500 manatadək cərimə edilməklə yanaşı, inzibati qaydada Azərbaycan Respublikasının hüdudlarından kənara çıxarılırlar./ajans.az