Dünyada ən uzun metro xətti bu şəhərdədir - 420-dən çox stansiyası var

Çinin iqtisadi və maliyyə mərkəzi olan Şanxayda yeni metro stansiyalarının istifadəyə verilməsi ilə metro xətlərinin ümumi uzunluğu 705 kilometrə çatıb. Avtosfer.az Azərtac-a istinadən bildirir ki, Şanxay bununla dünyada ən uzun metro xəttinə sahib olan şəhər statusunu daha da möhkəmləndirib. Yeni istifadəyə stansiyalar 5-ci və 13-cü xətlərin üzərində yerləşir. Bu xətlər şəhər mərkəzini ətraf ərazilərlə birləşdirir.

Qeyd edək ki, 1993-cü ildə 4,4 kilometrlik Cənub Dəmir yolu stansiyası-Xuciahuy xətti ilə istifadəyə verilən Şanxay metrosunda hazırda 17 xətti və 420-dən çox stansiyası fəaliyyət göstərir. Dünyada ən sürətlə inkişaf edən yeraltı dəmir yolu nəqliyyatı olan Şanxay metrosundan ötən il 3 milyard 536 milyon sərnişin istifadə edib. Gündəlik sərnişindaşıma qabiliyyəti təxminən 10 milyona çatan Şanxay metrosunun uzunluğunun 2023-cü ilədək 1154 kilometrə, xətlərin sayının isə 27-yə çatdırılması planlaşdırılıb.