Ev təsərrüfatlarının rəqəmsal uçotu nəyi dəyişəcək? – EKSPERT

Ev təsərrüfatlarının uçotu zamanı kompüter, notbuk və planşetlərin sayı, eləcə də internetə çıxış imkanları ilə bağlı məlumatların toplanması ölkədə rəqəmsal imkanların qiymətləndirilməsi baxımından əhəmiyyət daşıyır. Bu göstəricilər əhalinin texnologiyalardan istifadə səviyyəsini və regionlar üzrə internet əlçatanlığını müəyyən etməyə imkan verir.

Avtosfer.az xəbər verir ki, uçot zamanı internetə çıxışın sabit və simsiz olmaqla iki kateqoriyaya bölünməsi də nəzərdə tutulur. 
Bəs toplanacaq məlumatlar regionlar üzrə rəqəmsal bərabərsizliyin müəyyənləşdirilməsinə və internet infrastrukturunun inkişafına necə təsir göstərəcək?

Mövzu ilə bağlı İT(informasiya texnologiyaları) üzrə mütəxəssis Fərid Kazımov Avtosfer.az-a açıqlamasında bildirib ki, bunun əsas məqsədi ölkədə rəqəmsallaşma səviyyəsini daha dəqiq qiymətləndirməkdir:

''BMT və digər beynəlxalq təşkilatların rəqəmsallaşma üzrə müxtəlif qlobal reytinqləri mövcuddur. Bu reytinqlərdə internetə qoşulan qurğuların sayı və onlardan istifadə səviyyəsi də mühüm göstəricilərdən biri hesab olunur. Bu baxımdan, aparılacaq uçot Azərbaycanda mövcud real vəziyyəti müəyyən etməyə imkan verəcək. Belə ki, ölkədə nə qədər kompüter, notbuk və digər elektron qurğunun olduğunu, onların neçəsinin internetə çıxış imkanına malik olduğunu öyrənə biləcəyik. Nəzərə almaq lazımdır ki, bir nəfər eyni vaxtda bir neçə elektron qurğudan istifadə edə bilər. Məsələn, mənim özümün də internetə çıxışı olan üç-dörd elektron cihazım var. Digər vətəndaşlarda da bu vəziyyət müşahidə oluna bilər. Ona görə də bu göstəricilər ölkənin rəqəmsallaşma səviyyəsini müəyyənləşdirmək və beynəlxalq reytinqlərdə mövqeyini qiymətləndirmək baxımından əhəmiyyətlidir''.
Mütəxəssiz qeyd edib ki, toplanacaq məlumatlar regionlar üzrə  internetdən istifadə vəziyyətini və rəqəmsallaşma səviyyəsini daha ətraflı təhlil etməyə də imkan verəcək:
''Çünki hər hansı regionda internet infrastrukturunun mövcud olması bütün əhalinin eyni formada internetdən istifadə etməsi demək deyil. Müəyyən ərazidə sabit internet infrastrukturu olsa da, istifadəçilərin əksəriyyəti simsiz internetə üstünlük verə bilər. Hətta Bakı şəhərində də bu cür fərqlər müşahidə oluna bilər. Aparılacaq təhlillər hansı ərazilərdə simsiz, hansı ərazilərdə isə sabit internetdən daha çox istifadə edildiyini üzə çıxaracaq. Bu rəqəmlər rəqəmsal bərabərsizliyin müəyyənləşdirilməsi baxımından da əhəmiyyətlidir. Eyni zamanda, beynəlxalq rəqəmsallaşma reytinqlərində Azərbaycanın mövqeyinin yaxşılaşdırılması üçün vacib göstəricilərdən biridir. Lakin regionlar üzrə real vəziyyəti qiymətləndirmək üçün bu məlumatlar digər göstəricilərlə müqayisəli şəkildə təhlil edilməlidir''.

Fatimə