Ev ustası narazılıq etdi; "Dövlət heç kəsə "get betondan kəs, camaata ziyan vur" demir – VİDEO

Bakıda yeni tikilən yaşayış binalarından birində keyfiyyətsiz betonun istifadə olunması ilə bağlı iddialar gündəmə gəlib. “Koroğlu” metro stansiyası yaxınlığında tikilən yeni binadakı vəziyyət sosial şəbəkələrdə müzakirələrə səbəb olub.

Avtosfer.az xəbər verir ki, binadakı mənzillərdən birində usta kimi çalışan şəxs bildirib ki, tikinti prosesində beton laylarının qalınlığı standartlara uyğun deyil, həmçinin istifadə olunan materialın keyfiyyəti zəifdir.

Onun sözlərinə görə, betonun santimetr qalınlığının az olması və armaturun normadan incə seçilməsi binanın ümumi dayanıqlığına mənfi təsir göstərir:
“Evdə rahat yaşamaq üçün əsas məsələ təhlükəsizlikdir. Betonun keyfiyyətsiz olması və armaturun nazikliyi gələcəkdə binada çatların əmələ gəlməsinə, hətta daha ciddi fəsadlara gətirib çıxara bilər. Mənzili almışam, amma belə görüntüləri görəndə təbii ki, narahat oluram”.

Mütəxəssislər də bildirirlər ki, tikinti zamanı keyfiyyətsiz betonun istifadəsi binanın seysmik davamlılığını zəiflədir və uzunmüddətli istismarda təhlükə yarada bilər. Tikinti sektorunda tez-tez rast gəlinən bu kimi problemlər sakinlərin etimadına zərbə vurur və vətəndaşların aldıqları evlərdən narahatlıqla istifadə etməsinə səbəb olur.

Eltac Zülfüqaroğlu