"Ford"un elektromobillərində bu funksiya ödənişli olacaq – 850 manat - FOTO

ABŞ-də yerləşən avtomobil nəhəngi “Ford” elektrikli avtomobillərinin avadanlıq siyasətində dəyişiklik edib.

Avtosfer.az xəbər verir ki, şirkət “Mustang Mach-E” modelində ön baqaj hissəsini (frunk) artıq standart siyahıdan çıxarır. 2026-cı model ilindən etibarən bu funksiya seçim paketinə daxil ediləcək.

İndiyədək avtomobilin ayrılmaz hissəsi kimi təqdim olunan ön saxlama bölməsindən istifadə etmək istəyən müştərilər təxminən 495 dollar (təxminən 840–850 manat) əlavə ödəniş etməli olacaqlar.

Sektor təmsilçiləri bu qərarı xərclərin optimallaşdırılması və avadanlıq siyahısının sadələşdirilməsi strategiyasının tərkib hissəsi kimi qiymətləndirirlər. Qeyd olunur ki, əsasən plastik konstruksiyadan ibarət olan bu hissənin ayrıca ödənişli seçimə çevrilməsi bəzi alıcıları alternativ, üçüncü tərəf istehsalçıların təklif etdiyi daha münasib variantlara yönləndirə bilər.

Mütəxəssislər isə bildirirlər ki, elektrikli avtomobillərdə artıq “standart” kimi qəbul olunan funksiyanın əlavə ödənişli seçimə çevrilməsi brend imicinə müəyyən risklər yarada bilər.

Eltac Zülfüqaroğlu