GDY Orta dəhliz üzrə məlumat mübadiləsini tam təmin edəcək

“Gürcüstan Dəmir Yolu” Orta dəhliz üzrə məlumat mübadiləsini tam şəkildə təmin etmək niyyətindədir.

Avtosfer.az "Report"a istinadən xəbər verir ki, bunu “Gürcüstan Dəmir Yolu”nun nümayəndəsi Maya Tçintçaraşvili Bakıda keçirilən 22-ci Xəzər Beynəlxalq Nəqliyyat, Tranzit və Logistika Sərgisi çərçivəsində təşkil olunmuş "Dəmir yolu nəqliyyatının rəqəmsallaşdırılması" panel müzakirəsində bildirib.

“Biz Orta dəhliz ölkələri və qonşu dəmir yolları ilə tam məlumat mübadiləsini təmin etməyi, elektron imzanın hüquqi aspektlərini uyğunlaşdırmağı, sensor əsaslı dərin məlumat analizi həyata keçirməyi planlaşdırırıq. Eyni zamanda, süni intellekt əsaslı müştəri xidmətləri və rəqəmsal sərnişin xidmətləri də planlarımız arasındadır,” – deyə o bildirib.

M. Tçintçaraşvili qeyd edib ki, artıq rəqəmsallaşma istiqamətində 3 mühüm addım atılıb: "Bunlara kağızsız əməliyyatların tətbiqi, Orta dəhliz üzrə yükdaşımaların asanlaşdırılması və gələcək fəaliyyət planlarının hazırlanması daxildir".