Güclü külək Bakıda fəsadlar törədib - VİDEO

Dünən gecədən paytaxtda əsməyə başlayan güclü külək bir sira fəsadlar törədib. Avtosfer.az məlumatına görə, külək ilk olaraq Bakı Dairəvi-1 avtomobil yolunda 10 metr hündürlüyündə T tipli məlumatverici lövhəni aşırıb. Hadisə nəticəsində Yeni Yasamal yaşayış massivinə gedən yolda, həmçinin Bakı Dairəvi-1 avtomobil yolunda avtonəqliyyat vasitələrinin hərəkətində maneə yaranıb. Çox keçməyib ki, aşan lövhə ərazidən kənarlaşdırılıb.

Küləyin fəsadı təkcə yol nişanı ilə bitməyib. Paytaxtın mərkəzi hissələrində gecə bir neçə ağac da qırılıb. Bakı Şəhər İcra Hakimiyyətinin Yaşıllaşdırma Təsərrüfatı Birliyinin bitkilərin mühafizəsi şöbəsinin rəisi Orxan Məmmədovun sözlərinə görə, külək bir cinar ağacını kökündən çıxarıb, daha 21 çinar, qarağac, qovaq və sərv ağaclarının isə budaqlarını sındırıb.

Bakı Şəhər İcra Hakimiyyəti güclü küləklə bağlı paytaxt sakinlərinə, xüsusilə sürücülərə xəbərdarlıq edib. Şöbə rəisi Orxan Məmmədov xüsusən avtomobilləri iri gövdəli ağacların altında saxlamamağı tövsiyə edir.

Qeyd edək ki, Ekologiya və Təbii Sərvətlər Nazirliyi də bu gün axşam saatlarından güclü şimal-qərb küləyinin əsəcəyi ilə bağlı məlumat yayıb.