Gürcüstanda beynəlxalq və yerli əhəmiyyətli yolların təmir və tikintisi üçün tender elan olunacaq

Gürcüstanda 70 kilometrədək yeni avtomobil yollarının tikintisi və 240 kilometrədək yolun təmiri və asfalt örtüyünün dəyişdirilməsi nəzərdə tutulub. Avtosfer.az Azərtac-a istinadən xəbər verir ki, bunu Gürcüstan televiziyasına müsahibəsində ölkənin infrastruktur və regional inkişaf nazirinin müavini İrakli Karseladze söyləyib.

Onun sözlərinə görə, Dünya Bankının layihəsi əsasında artıq Kaxeti bölgəsində bəzi işlərə başlanılıb.

Nəzərdə tutulmuş plana əsasən işlər həm beynəlxalq, həm də yerli əhəmiyyətli magistral yollarda aparılacaq.

İ.Karseladze deyib ki, yolların təmir-tikintisi ilə əlaqədar tender prosedurları hazırlanır. Tenderdə qalib gələcək şirkət yolların tikintisi, təmiri ilə bağlı bütün öhdəlikləri üzərinə götürəcək və 5 il yollara xidmət göstərəcək.