Hökməlidə içməli sudan pis qoxu gəlir - İDDİA

Abşeron rayonu, Hökməli qəsəbəsi ərazisində sakinlər içməli sudan pis qoxu gəldiyini iddia edirlər.

Avtosfer.az xəbər verir ki, bu barədə sosial şəbəkələrdə paylaşımlar edilib.

İddia olunub ki, altı aydan çoxdur, içməli sudan pis iy gəldiyi üçün sakinlər əziyyət çəkirlər.

Məsələ ilə bağlı Oxu.az-a İri Şəhərlərin Birləşmiş Su Təchizatı Xidmətindən bildirilib ki, qeyd edilən məsələ ilə bağlı quruma heç bir müraciət daxil olmayıb.

"Qayda belədir, abonentin dəqiq ünvanı və əlaqə nömrəsi təqdim edilməlidir ki, İri Şəhərlərin Birləşmiş Su Təchizatı Xidmətinin Suyun Təhlükəsizliyi və Ekologiya Şöbəsinin əməkdaşları həmin ünvandan su nümunəsi götürərək laboratoriyaya təqdim etsin. Məhz analizin nəticəsindən sonra vəziyyətə aydınlıq gətirilə bilər.

Onu da xatırladaq ki, əgər suyun keyfiyyəti ilə bağlı şikayət daxil olarsa, abonentlə əlaqə saxlanılır və zərurət olduğu təqdirdə plandankənar şəkildə su nümunələri laboratoriyalara göndərilərək uyğun parametrlər üzrə yoxlanışlardan keçirilir. Nəticələrə dair müvafiq şöbəyə məlumat verilir və problem müşahidə olunduqda aradan qaldırılması işi icra edilir", - deyə qurumun açıqlamasında vurğulanıb.