Hüseyn Abdullayevin məhkəməsində direktor ifadə verib

Bu gün Bakı Hərbi Məhkəməsində sabiq deputat Hüseyn Abdullayev, onun anası Zeynəb Abdullayeva, Həbib İbrahimov, Xalid Əliyev, Namiq Babayev, İntiqam Süleymanov, Pərviz Kazımov, Zaur Quliyev və Nazim Əliyevin cinayət işi üzrə məhkəmə iclası davam etdirilib.

Avtosfer.az-ın "Report"a istinadən xəbərinə görə, hakim Həbib Həsənovun sədrliyi ilə keçirilən prosesdə şahid qismində Bakı Autizm İdman və Yaşam Klubunun direktoru Elnur Məmmədov ifadə verib.

O, H.Abdullayevə məxsus obyekti kirayə götürdüyünü, daha sonra sabiq deputat tərəfindən hədə-qorxuya məruz qalıb: "Həmin vaxt icarəhaqqı bir müddət gecikdi. Hüseyn Abdullayev Almaniyadan zəng edib, mənə hədə-qorxu gəldi. O, icarə haqqını ödəməsən, başına oyun açacağını söylədi. Mən də qorxdum, sonra icarə haqqını ödədim".

Daha sonra Nəqliyyat, Rabitə və Yüksək Texnologiyalar Nazirliyində maliyyəçi vəzifəsində işləmiş Rəcəb Rəcəbov dindirilib. O, ifadə verən zaman H.Abdullayevdən şikayətçi olmadığını söyləyib.

Məhkəmənin növbəti iclası aprelin 18-nə təyin edilib.

Qeyd edək ki, rəsmi məlumata görə, ayrı-ayrı vətəndaşların Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsinə daxil olmuş müraciətləri əsasında 14 fevral 2018-ci il tarixdə başlanmış cinayət işi üzrə H.Abdullayevin 2006-cı ildən 2018-ci ilədək olan müddət ərzində faktiki nəzarət etdiyi “Araz-İnşaat” ASC-də onun tapşırığına əsasən, müəssisənin idarə olunmasını həyata keçirən Babayev Namiq İsmixan oğlu və qeyriləri ilə qabaqcadan əlbir olan bir qrup şəxs halında Cəmiyyətə məxsus obyektləri müxtəlif vaxtlarda ayrı-ayrı şirkətlərə icarəyə verərək, ümumilikdə, 1 milyon 374 min manat məbləğində gəlirlərin Cəmiyyətin kommunal xidmət və sair xərclərinin ödənilməsinə sərf olunmasına dair digər səhmdarlara yalan məlumat verməklə 13 min 373 manat məbləğində dividentləri vahid qəsdlə ələ keçirib zərərçəkmiş şəxslərə xeyli miqdarda maddi ziyan vurmaqla dələduzluq etməsinə şübhələr müəyyən edilib.

Təqsirləndirilən şəxslərdən bəziləri Dövlət Sərhəd Xidmətinin əməkdaşlarıdır. Bu səbəbdən cinayət işi Bakı Hərbi Məhkəməsinə göndərilib.

İş üzrə zərərçəkmiş şəxs qismində 28 nəfər tanınır.

Xatırladaq ki, iş üzrə təqsirləndirilən Z.Abdullayeva, H.İbrahimov, Z.Quliyev və P.Kazımov barəsində ev dustaqlığı qətimkan tədbiri seçilib.