Məktəbə maşınla yaxınlaşmaq üçün Şüvəlan yolundakı dairəyə getmək lazımdır – ŞİKAYƏT - VİDEO

Xəzər rayonunda yerləşən 92 nömrəli məktəbin ətrafındakı yol şəraiti şagirdlər və müəllimlər üçün ciddi çətinlik yaradır.

Avtosfer.az-ın sosial şəbəkə hesabına video göndərən vətəndaş məktəb yoluna gediş-gəlişin çətinliyi ilə bağlı məlumat verib. O qeyd edib ki, məktəbə yaxınlaşa bilmək üçün avtomobillə “Stansiya Qala” tərəfə gedib oradan geriyə dönmək, daha sonra isə Qala-Şüvəlan yolundakı dairədən bir də geriyə dönərək mümkündür. Bu isə çox uzun məsafə olduğu üçün həm müəllimlər, həm də şagirdlər əziyyət çəkir.

Digər tərəfdən, məktəbdən çıxaraq piyada hərəkət etməli olanlar üçün də şərait yoxdur. Səkilərin olmaması buradan istifadə edən şagirdlərin, valideynlərin və müəllimlərin həyatını təhükəyə atır.

Məktəbə gedən müəllimlər və şagirdlər bu səbəbdən yol kənarında hərəkət etməyə məcbur qalır, bəzi hissələrdə isə təhlükə daha da artır.
Vətəndaşlar aidiyyəti qurumlardan məsələni tez bir zamanda həll etmələrini tələb edirlər. Onların fikrincə, məktəbə təhlükəsiz piyada yolu çəkilməsi həm şagirdlərin, həm də müəllimlərin təhlükəsizliyini təmin edəcək, gündəlik gediş-gəlişi xeyli asanlaşdıracaq.

Eltac Zülfüqaroğlu