Meloninin Bakıya gəlməsi Azərbaycana nə qazandıracaq? - EKSPERT

İtaliyanın Baş naziri Ciorcia Meloninin Bakıya səfəri Azərbaycan–İtaliya münasibətlərinin yeni mərhələyə yüksəldiyini bir daha təsdiqləyir. 

Avtosfer.az xəbər verir ki, nəqliyyat eksperti Rauf Ağamirzəyevin sözlərinə görə, bu əlaqələr artıq sırf iqtisadi əməkdaşlıq çərçivəsini aşaraq çoxşaxəli strateji tərəfdaşlıq səviyyəsinə çatıb.

Ekspert bildirib ki, Azərbaycan üçün əsas ticarət tərəfdaşlarından biri olan İtaliya ilə münasibətlər xüsusilə enerji təhlükəsizliyi baxımından Avropa üçün mühüm əhəmiyyət daşıyır. Onun sözlərinə görə, Xəzər regionundan Avropaya uzanan Cənub Qaz Dəhlizi artıq yalnız enerji layihəsi deyil, bütövlükdə Avropanın enerji arxitekturasının əsas sütunlarından birinə çevrilib. Bu dəhliz vasitəsilə İtaliya təkcə öz enerji tələbatını qarşılamır, eyni zamanda Avstriya və Almaniya kimi ölkələr üçün də mühüm tranzit rolunu yerinə yetirir.

2026-cı ildən etibarən Azərbaycan qazının yeni bazarlara çıxışı İtaliyanın rolunu daha da gücləndirəcək və bu ölkəni Avropanın aparıcı qaz tranzit mərkəzlərindən birinə çevirəcək. Bu isə Azərbaycan–İtaliya əməkdaşlığını regional çərçivədən çıxararaq qlobal strateji tərəfdaşlıq səviyyəsinə yüksəldir.

İki ölkə arasında əməkdaşlıq təkcə enerji sektoru ilə məhdudlaşmır. Azərbaycan Dövlət Neft Fondunun beynəlxalq maliyyə platformaları vasitəsilə İtaliyanın nəqliyyat sektoruna investisiya yatırması bu münasibətlərin artıq infrastruktur və logistika sahələrini də əhatə etdiyini göstərir. Eyni zamanda, “8 Noyabr” İstilik Elektrik Stansiyası layihəsində İtaliya şirkətinin iştirakı sənaye əməkdaşlığı və texnologiya transferinin də tərəfdaşlığın əsas komponentlərindən birinə çevrildiyini nümayiş etdirir.

Ekspert vurğulayıb ki, bütün bu amillər Azərbaycan–İtaliya münasibətlərinin klassik ticarət əlaqələrindən fərqli olaraq enerji, nəqliyyat, maliyyə və sənaye sahələrini birləşdirən kompleks strateji modelə transformasiya olunduğunu göstərir. Bu model həm Azərbaycanın Avropadakı mövqeyini gücləndirir, həm də İtaliyanı Cənubi Qafqaz və Xəzər regionu ilə birləşdirən əsas geoiqtisadi körpülərdən birinə çevirir.

Eltac Zülfüqaroğlu