Mərdəkan qalasının bərpası niyə başa çatmır? – Memar DANIŞDI

XIII əsrə aid dairəvi Mərdəkan qalasında aparılan bərpa işlərinin uzun müddətdir başa çatmaması ictimai müzakirələrə səbəb olub. Belə tarixi abidələrin bərpası zamanı şəffaflıq və peşəkar yanaşma xüsusi əhəmiyyət daşıyır.

Avtosfer.az xəbər verir ki, bu fikirləri memar Elçin Əliyev səsləndirib.

Onun sözlərinə görə, Mədəniyyət Nazirliyinin qalanın bərpa layihəsinin hazırlanmasını həvalə etdiyi podratçı şirkətlərlə bağlı açıq mənbələrdə məhdud məlumat mövcuddur. Memar bildirib ki, ictimaiyyət podratçıların bu sahədə hansı təcrübəyə malik olduğu, seçim zamanı hansı meyarların əsas götürüldüyü və layihənin hansı mərhələdə olduğu barədə ətraflı məlumatlandırılmalıdır.

Elçin Əliyev qeyd edib ki, Mərdəkan qalası memar Əbdülməcid ibn Məsud tərəfindən Şirvanşah Fəriburzun əmri ilə inşa edilmiş Azərbaycanın mühüm tarixi-memarlıq abidələrindən biridir. Belə irs nümunələrinin bərpası yüksək ixtisaslaşmış mütəxəssislər tərəfindən və beynəlxalq konservasiya prinsiplərinə uyğun şəkildə həyata keçirilməlidir.

Bərpa işlərinin bir neçə ildir davam etməsinə baxmayaraq, layihənin hələ də yekunlaşmaması suallar doğurur. Layihənin icra vəziyyəti, görülən işlər, ayrılmış vəsait, gecikmənin səbəbləri və bərpanın başa çatacağı tarix barədə ictimaiyyətə rəsmi məlumat verilməsi məqsədəuyğun olardı.

Memarın sözlərinə görə, tarixi-mədəni irs obyektlərinin qorunması yalnız dövlət qurumlarının deyil, bütövlükdə cəmiyyətin maraqlarına xidmət edir. Bu baxımdan, belə layihələrdə şəffaflığın təmin olunması, müntəzəm ictimai məlumatlandırmanın aparılması və görülən işlərə peşəkar nəzarətin gücləndirilməsi həm irsin qorunmasına, həm də ictimai etimadın artırılmasına töhfə verə bilər.

Eltac Zülfüqaroğlu