Meşə fondunun torpağı sahibkara satılıb? – İDDİA - FOTO

Qalınçaq meşəbəyliyinin 14 saylı meşə dolayının 13-cü kvartalında, Bakı–Qəbələ magistral yolunun kənarında yerləşən meşə fondu torpağının Nazirlər Kabinetinin müvafiq qərarı olmadan meşə fondunun xəritəsindən çıxarıldığı iddia olunur.

Avtosfer.az xəbər verir ki, məlum olduğu kimi, meşə fondu torpaqlarının təyinatının dəyişdirilməsi və ya həmin ərazilərin meşə fondundan çıxarılması qanunvericiliyə uyğun olaraq yalnız müvafiq qərarlar əsasında həyata keçirilə bilər. Bu baxımdan sözügedən ərazi ilə bağlı yaranan vəziyyət bir sıra suallar doğurur.

Bəs İsmayıllı rayonunda qeyd olunan meşə fondu torpağının Nazirlər Kabinetinin qərarı olmadan xəritədən çıxarılması necə baş verib, bunun hüquqi əsasları və səbəbləri nədən ibarətdir? Həmin ərazinin hansı məqsədlə ayrılması və gələcəkdə hansı layihənin həyata keçirilməsi nəzərdə tutulur?

Əmlak Məsələləri Dövlət Xidmətindən Avtosfer.az-ın sorğusuna cavab olaraq bildirilib ki, daşınmaz Əmlakın Dövlət Kadastrı və Reyestri” PHŞ-nin 9 saylı Qəbələ Ərazi İdarəsi tərəfindən tərtib olunmuş torpaq sahəsinin ortofoto görüntüsündə işarələnmiş ərazinin ümumi sahəsi 14,85 hektar təşkil edir. Bu torpaq sahəsinin 8,2 ha hissəsi dövlət meşə fondu torpaqlarına, 5,56 ha hissəsi kənd təsərrüfatı təyinatlı pay torpaqlarına və 1,09 ha hissəsi isə yaşayış məntəqələrinin torpaqlarına aiddir.

Aparılan araşdırma nəticəsində adıçəkilən ərazidə torpaqların kateqoriyasının dəyişdirilməsi halları olmayıb.

Eltac Zülfüqaroğlu