“Müasir Azərbaycan gəncliyini narkomaniyadan qoruyaq”

Astara Rayon Polis Şöbəsinin təşkilatçılığı ilə rayonun Kijəbə qəsəbə tam orta məktəbində “Müasir Azərbaycan gəncliyini narkomaniyadan qoruyaq” mövzusunda tədbir təşkil olunub.

DİN Mətbuat Xidmətinin Lənkəran regional qrupundan Avtosfer.az-a verilən məlumata görə, tədbirdə Astara RPŞ-nin rəisi, polis polkovniki Azər Cahangirov, Rayon Təhsil Şöbəsinin müdiri Rəşad Həsənov, rayon veteranlar şurasının sədri Rafiq Əliyev, rayon mərkəzi xəstəxanasının həkim-narkoloqu Oqtay Əmənullayev iştirak ediblər.

Çıxış edən RPŞ-nin rəisi Azər Cahangirov bildirib ki, hazırda bəşəriyyəti düşündürən və narahat edən ən ağır problemlərdən biri narkomaniyadır. Şöbə rəisi ağ ölümün səbəb olduğu dəhşətli nəticələrdən, ölkəmizdə bu ağır bəlaya qarşı aparılan mübarizədən danışıb. Narkomaniyanın qarşısının alınması ilə bağlı həyata keçirilən tədbirlərə diqqətin artırılmasının vacibliyini vurğulayıb. Qeyd edib ki, Daxili İşlər Nazirliyinin və yerli polis orqanlarının əməkdaşları narkotik vasitələrin qanunsuz dövriyyəsinə qarşı sərt tədbirlər görməklə yanaşı, həm də gənclərlə vaxtaşırı maarifləndirici görüşlər keçirir. Bu işdə təkcə dövlət strukturları deyil, cəmiyyətin bütün təbəqələrinin nümayəndələri də fəal iştirak etməlidirlər.

Sonra çıxış edən Rayon veteranlar şurasının sədri Rafiq Əliyev, rayon təhsil şöbəsinin müdiri Rəşad Həsənov, rayon mərkəzi xəstəxanasının həkim-narkoloqu Oqtay Əmənullayev və digərləri polis əməkdaşları tərəfindən məktəblərdə belə görüşlərin keçirilməsini yüksək qiymətləndirdilər, öz təşəkkür və minnətdarlıqlarını bildirdilər.

Sonda tədbir iştirakçılarının sualları cavablandırılıb.

Namiq