Obyektlərin icarə xərcləri onlayn ticarətə təkan verir – Ekspert RƏYİ

Dünyada sürətlə yayılan onlayn ticarət trendi Azərbaycanda da öz təsirini göstərməkdədir. Onlayn biznesin sürətli inkişafı iqtisadiyyatın strukturunda mühüm dəyişikliklərə səbəb olub. Ənənəvi satış və xidmət modelləri getdikcə rəqəmsal platformalarla əvəzlənib, bu da bazarın fəaliyyət prinsiplərini yenidən formalaşdırıb. Bununla yanaşı onlayn biznesin genişlənməsi rəqabəti daha da artırdı.
Məsələ ilə bağlı iqtisadçı Natiq Cəfərli Avtosfer.az-a açıqlamasında bildirib ki, dünyada baş verən bir trend olaraq onlayn ticarət Azərbaycanda da getdikcə populyarlaşır və əvvəllər yalnız ənənəvi ticarətlə məşğul olanlar da buna uyğunlaşmağa başlayıblar. Onlar öz konsepsiyalarını dəyişməlidirlər:

"Məsələn, ənənəvi ticarətdə ən böyük xərclərdən biri icarə haqqıdır. Şəhərin mərkəzində və ya mərkəzə yaxın ərazilərdə mağazaların icarə qiyməti 5–10 min arasında, bəzən isə daha yüksək olur. Bu da sahibkarlar üçün ciddi maliyyə yükü yaradır və nəticədə məhsul qiymətlərinə təsir edir. Hazırda ənənəvi ticarətlə məşğul olanlar tədricən onlayn platformalara keçərək xərclərini azaltmalı və daha rəqabətli mövqe qazanmalıdırlar. Bu, qlobal bir tendensiyadır. Bir sahədə iş yerləri azalırsa, digər sahələrdə məsələn, çatdırılma və reklam xidmətlərində yeni imkanlar yaranır. Bu xidmətlərə tələbat da artmaqdadır. Buna görə də dünyada müşahidə olunan bu tendensiyaya uyğun olaraq, Azərbaycanda da oflayn ticarətdən onlayn platformalara keçid qaçılmazdır".
İqtisadiyyat məsələləri ilə bağlı mütəxəssis Xalid Kərimlinin fikrincə, artıq ənənəvi bizneslər də müştərilərinə çatmaq və məhsul və xidmətləri haqqında məlumat vermək üçün getdikcə daha çox onlayn kanallardan istifadə edirlər. Sosial şəbəkələr, “Google” və digər rəqəmsal platformalar bu baxımdan əsas vasitələrə çevrilib:

“Bu kanallar bizneslərə daha geniş auditoriyaya çıxış imkanı yaradır və kommunikasiya imkanlarını artırır. Lakin onlayn ticarət sahəsində müəyyən problemlər də mövcuddur. Xüsusilə xaricdən gətirilən məhsulların bəzi hallarda vergiyə cəlb olunmaması yerli ənənəvi ticarət üçün haqsız rəqabət mühiti yaradır. Belə ki, vətəndaşlar onlayn alış-veriş zamanı müəyyən məbləğə qədər vergi ödəmədiyi halda, ənənəvi mağazalarda bu xərclər qiymətə daxil edilir. Nəticədə, satış kanalları arasında balans pozulur və bu, ənənəvi ticarətə mənfi təsir göstərir. Bu məsələ bazarda daha ədalətli rəqabət mühitinin formalaşdırılması zərurətini ortaya qoyur".

Fatimə Dadaşova