Oğurladığı avtomobillə tələbənin ölümünə səbəb olan sürücünün istintaqı başa çatıb

Bakıda tələbənin ölümünə səbəb olan sürücü Tural Rəsulovun cinayət işi üzrə ibtidai istintaq başa çatıb. Avtosfer.az-ın APA-ya istinadən məlumatına görə, T. Rəsulov barəsində toplanan cinayət işinin materialları baxılması üçün Bakı Ağır Cinayətlər Məhkəməsinə göndərilib. Cinayət işi hakim Əfqan Hacıyevin icraatına verilib. Məhkəmənin hazırlıq iclasının vaxtı açıqlanmayıb. Qeyd edək ki, hadisə bu il aprelin 5-də Yasamal rayonunda qeydə alınıb. Azərbaycan Texniki Universitetinin III kurs tələbəsi, 1999-cu il təvəllüdlü İlkin Bəxtiyar oğlu Şahbazi “Chrysler” markalı avtomobillə vurulub. Piyada aldığı xəsarət nəticəsində ölüb. Hadisəni törətməkdə şübhəli bilinən  Rəsulov Tural Söhbət oğlu olub. Məlum olub ki, o, bu maşını Bakı Əyləncə Mərkəzinin dayanacağından həmin gün saat 12.00-da qaçırıb. Hadisə isə saat 13.50-də baş verib. 50 DC 346 dövlət nömrə nişanlı “Chrysler” markalı avtomobilin sahibi isə  23 yaşlı Vəliyev Samir Əmirxan oğludur.