Paşinyan Qarabağ məsələsində zamanında səhvə yol verdiklərini bəyan edib: “Sülhü ...”

Paşinyan Ermənistanın Qarabağa iddialarının səhv olduğunu və bunu düzəltməklə ölkənin rifahını yaxşılaşdırdığını bildirib.

Avtosfer.az "Tezadlar"a istinadən xəbər verir ki, o, növbəti nəslə “qanaxma verən yara” deyil, sülh ötürmək lazım olduğunu vurğulayıb.

Ermənistanın baş naziri Nikol Paşinyan Qarabağın Ermənistan olması fikrinə uymağın səhvini qəbul etdiyini və gələcək nəsillərə sülh ötürməyi seçdiyini söyləyib.

“Bəli, mən “Qarabağ Ermənistandır, nöqtə” deyən insanam. Bu, ona görədir ki, mən 30 il bizi bəsləyən ideyaya sadiq idim”, – deyə Nikol Paşinyan bildirib.

Bu gün Geqarkunik bölgəsinin Tsovak kəndində keçirilən kampaniya zamanı çıxış edərkən o, sonradan növbəti nəslə uzunmüddətli münaqişə deyil, dinc gələcək ötürmək lazım olduğunu anladığını söyləyib.

“Bu münaqişəni, bu qanayan yaranı gələcək nəsillərə ötürməyə haqqımız yoxdur. Sülhü övladlarımıza ötürməliyik. Bəli, cəsarət göstərən və insanlara səhv yolla getdiyimizə, dayanmalı olduğumuza və “Qarabağ hərəkatını” davam etdirməməli olduğumuzu deyən mən idim” – Nikol Paşinyan deyib.

Ermənistanın Baş naziri qeyd edib ki, Qarabağın Azərbaycan olduğunun tanınması respublikanın müstəqilliyini və çiçəklənməsini artırmağa kömək edib.

“Bunun sayəsində biz indi əvvəlkindən daha böyük, əvvəlkindən daha müstəqil, əvvəlkindən daha təhlükəsiz və əvvəlkindən daha çiçəklənən bir dövlətik”, – deyə Nikol Paşinyan bəyan edib.