Prospektdəki divarda Sovet dövrünə aid dekorasiya sökülür? – MEMAR - FOTOSESSİYA

Paytaxtda Sovet dövrünə aid monumental-dekorativ sənət nümunələrinin taleyi yenidən müzakirə mövzusuna çevrilib.

Avtosfer.az xəbər verir ki, məsələ ilə bağlı memar Elçin Əliyev narahatlığını ifadə edib. O bildirib ki, şəhərimizdə həmin dövrə aid monumental-dekorativ sənət nümunələrindən artıq çox az sayda qalıb və mövcud olanlar da xüsusi həssaslıqla qorunmalıdır.

Memarın sözlərinə görə, 8 Noyabr prospekti ilə hərəkət edərkən belə nümunələrdən biri ilə bağlı xoşagəlməz mənzərənin şahidi olub.

“Elə abidələr, monumental pannolar və dekorativ kompozisiyalar var ki, onlar təkcə bir dövrün ideoloji yükünü deyil, həm də həmin zamanın memarlıq-estetik düşüncəsini, sənət baxışını əks etdirir. Bu nümunələri göz bəbəyi kimi qorumaq lazımdır. Lakin bu gün 8 Noyabr prospekti ilə hərəkət edərkən gördüyüm mənzərə məni ciddi şəkildə narahat etdi. Nə baş verir? Yenə də məmur savadsızlığı ucbatından öz tariximizi və mədəniyyətimizi silirik?” – deyə Elçin Əliyev qeyd edib.

Memar vurğulayıb ki, şəhər mühitində aparılan yenidənqurma və abadlıq işləri tarixi-mədəni irsin qorunması prinsipləri ilə uzlaşdırılmalıdır. Onun sözlərinə görə, Sovet dövrünə aid monumental sənət nümunələri şəhərin vizual yaddaşının bir hissəsidir və onların məhv edilməsi gələcək nəsillərin mədəni irsinin itirilməsi deməkdir.

Eltac