Qayınatasını döyən dünya çempionunun azyaşlı övladları məhkəmədə dindirilib

Bu gün Bakı Ağır Cinayətlər Məhkəməsində kikboks üzrə beşqat dünya çempionu Ehram Məcidovun cinayət işi üzrə məhkəmə iclası davam etdirilib. Avtosfer.az-ın "Report"a istinadən xəbərinə görə, hakim Eldar İsmayılovun sədrliyi ilə keçirilən prosesdə zərərçəkmiş Bəhruz Dilbazinin həyat yoldaşı Firəngiz Yusifova ifadə verib. O qeyd edib ki, hadisə zamanı orada olub, E.Məcidovun B.Dilbazini döyməsinə şahidlik edib.

Daha sonra E.Məcidovun övladları - 12 yaşlı oğlu və 9 yaşlı qızı şahid qismində dindirilib.

Suallara cavab verən uşaqlar atasını sevmədiklərini, ondan qorxduqlarını söyləyiblər.

E.Məcidovun 12 yaşlı oğlunun sözlərinə görə, atası anasının üstünə bıçaq çəkib: "Çünkü atam anamı sevmirdi. Babamı döyəndə mən də orada idim. Atam babamı "beşbarmaq"la döyürdü".

E.Məcidov oğluna digər babasının, əmisinin və bibilərinin də onu çox sevdiklərini, bu gün də məhkəməyə gəldiklərini vurğulayıb.

Uşaq isə "istəyən idilər əvvəldən istəyərdilər" cavabını verib.

Məhkəmənin növbəti iclası martın 6-na təyin edilib.

Qeyd edək ki, E.Məcidov "Neftçi” İSM-də kikboks bölməsinin baş məşqçisi olub. O, qayınatası Bəhruz Dilbazini döyməkdə ittiham edilir.

E.Məcidovun barəsində Cinayət Məcəlləsinin 126.2.4-cü (qəsdən sağlamlığa ağır zərər vurma, ümumi təhlükəli üsulla, xuliqanlıq niyyətilə) maddəsi ilə ittiham irəli sürülüb. Məhkəmənin qərarı ilə onun barəsində həbs qətimkan tədbiri seçilib.

Məlumata görə, E.Məcidov 2016-cı ildə həyat yoldaşı Müqəddə Dilbazi ilə boşanıb. Cütlüyün nikahndan bir övladı olub. Uşaq ananın himayəsinə verilib. 2017-ci ildə isə M.Dilbazi məhkəməyə müraciət edərək uşağın xarici ölkəyə aparılmasına icazə verilməsini istəyib. Bununla bağlı E.Məcidovla arvadı arasında uzun sürən məhkəmə çəkişmələri də olub.

Son dövrdə isə E.Məcidov övladı ilə ünsiyyət qurmasına keçmiş həyat yoldaşı və onun valideynləri tərəfindən maneələr yaradıldığını bildirib. İdmançının bununla bağlı müraciətini Binəqədi rayon İcra şöbəsi araşdırıb. Hadisə də şöbənin inzibati binasında baş verib. İcra məmuru Vüqar Alıyevin otağında görüşən tərəflər atanın uşaqla görüşməsi ilə bağlı mübahisə ediblər.

İddiaya görə, E.Məcidovun keçmiş qayınatası B.Dilbazi məmurun otağında onu söyüb və kikboksçu qarşı tərəfə bir yumruq zərbəsi vurub.