Qayınatasını döyən dünya çempionunun işi ekspertizaya göndərilib

Bu gün Bakı Ağır Cinayətlər Məhkəməsində kikboks üzrə 5 qat dünya çempionu Ehram Məcidovun cinayət işi üzrə məhkəmə iclası davam etdirilib. Avtosfer.az-ın "Report"a istinadən xəbərinə görə, hakim Eldar İsmayılovun sədrliyi ilə keçirilən prosesdə bir neçə şahid dindirilib. Daha sonra sənədlərin tədqiqi mərhələsi başlayıb. Elan olunub ki, E.Məcidov qayınatası Bəhruz Dilbazini vurandan sonra zərərçəkmişin xəsarətləri ilə bağlı iki tibbi ekspertiza rəyi var.

İlk rəydə xəsarətlərin dərəcəsinin az ağır olduğu göstərilsə də, dörd ay sonra keçirilən tibbi ekspertizada xəsarətlərin insan sağlamlığı üçün təhlükəli olan ağır xəsarətlər olduğu qeyd edilib. Məhkəmədə E.Məcidovun vəkili vəsatət qaldıraraq təkrar ekspertizanın keçirilməsini istəyib.

Vəsatət təmin edilib, məhkəmə təkrar ekspertizanın keçirilməsi ilə bağlı qərar verib.

Proses qeyri-müəyyən günədək təxirə salınıb.

Qeyd edək ki, E.Məcidov "Neftçi” İSM-də kikboks bölməsinin baş məşqçisi olub. O, qayınatası Bəhruz Dilbazini döyməkdə ittiham edilir.

E.Məcidovun barəsində Cinayət Məcəlləsinin 126.2.4-cü (qəsdən sağlamlığa ağır zərər vurma, ümumi təhlükəli üsulla, xuliqanlıq niyyətilə) maddəsi ilə ittiham irəli sürülüb. Məhkəmənin qərarı ilə onun barəsində həbs qətimkan tədbiri seçilib.

Məlumata görə, E.Məcidov 2016-cı ildə həyat yoldaşı Müqəddə Dilbazi ilə boşanıb. Cütlüyün nikahndan bir övladı olub. Uşaq ananın himayəsinə verilib. 2017-ci ildə isə M.Dilbazi məhkəməyə müraciət edərək uşağın xarici ölkəyə aparılmasına icazə verilməsini istəyib. Bununla bağlı E.Məcidovla arvadı arasında uzun sürən məhkəmə çəkişmələri də olub.

Son dövrdə isə E.Məcidov övladı ilə ünsiyyət qurmasına keçmiş həyat yoldaşı və onun valideynləri tərəfindən maneələr yaradıldığını bildirib. İdmançının bununla bağlı müraciətini Binəqədi rayon İcra şöbəsi araşdırıb. Hadisə də şöbənin inzibati binasında baş verib. İcra məmuru Vüqar Alıyevin otağında görüşən tərəflər atanın uşaqla görüşməsi ilə bağlı mübahisə ediblər.

İddiaya görə, E.Məcidovun keçmiş qayınatası B.Dilbazi məmurun otağında onu söyüb və kikboksçu qarşı tərəfə bir yumruq zərbəsi vurub.