Qubada qırıcımızın havaya qaldırılmasının səbəbi bilindi - Yeni açıqlama

İyulun 23-də Quba rayonu səmasında çox aşağı hündürlükdə qırıcı uçduğuna dair məlumatlar yayılıb. Müdafiə Nazirliyi sözügedən qırıcının Azərbaycana məxsus olduğunu, Hərbi Hava Qüvvələrinin təlim-məşq uçuşları həyata keçirdiyini açıqlayıb. Bununla belə, sülh şəraitində bu tip təlimlərin keçirilməsi ilə bağlı müxtəlif yanaşmalar var: bir qisim zəruri olduğunu düşünsə də, əksini deyənlər də olur.

Avtosfer.az-ın məlumatına görə, "Globalinfo"ya danışan hərbi ekspert Ədalət Verdiyev deyib ki, Azərbaycan Silahlı Qüvvələri ölkənin mövcud sərhədləri daxilində istənilən ərazidə istənilən növ təlim keçirmək hüququna malikdir:

Ədalət Verdiyev

“Bu təlimlər əvvəlcədən planlaşdırılmış fəaliyyətlərdir. Onların keçirilməsində qeyri-adi heç nə yoxdur. Vətəndaşlarımız bu məsələdən narahat olmamalıdır. Zərurət yarandıqda təlimlərlə bağlı ictimaiyyətə mütəmadi məlumat verilir”.

Politoloq Qabil Hüseynli də bildirib ki, təlimlərin keçirilməsində qeyri-adi heç nə yoxdur.

“Adətən belə təlimlər əvvəlcədən planlaşdırılır. Hesab edirəm ki, narahatlığa əsas yoxdur. Digər tərəfdən, ölkəmizə yaxın regionlarda müharibələrin davam etməsi danılmaz faktdır.

Qabil Hüseynli

Ümumiyyətlə, dünya həssas dönəmdən keçir, müxtəlif regionlarda müharibələr gedir. Belə bir məqamda Azərbaycan Ordusunun hər hansı təlimlər keçirməsi, istənilən vəziyyət hazır olmaq baxımdan təbiidir. Rusiya–Ukrayna müharibəsi davam edir, eyni zamanda ABŞ-ın İrana qarşı quru əməliyyatlarına hazırlaşdığına dair müxtəlif məlumatlar yayılır. Belə bir şəraitdə ordumuzun döyüş bacarıqlarını inkişaf etdirməsi və mümkün təhlükələrə qarşı hazırlığını artırmaq məqsədilə təlimlər keçirməsi olduqca vacibdir”.