Quduzluqla mübarizə günü və sahibsiz itlər

2007-ci ildən etibarən hər il sentyabrın 28-i Quduzluqla Mübarizə Günü (World Rabies Day) kimi qeyd olunur. Ümumdünya Heyvan Sağlamlığı Təşkilatının (WOAH) hədəfi

2030-cu ilə qədər sahibsiz itlər vasitəsilə bu xəstəliyə yoluxma hallarının tamamilə qarşısını almaqdır.

Avtosfer.az xəbər verir ki, quduzluq xəstəliyi insana it, pişik, çaqqal və yarasalardan keçir. Onlar mal-qaranı da yoluxdura bilər. Balıq və quşların sinir sistemi fərqli olduğu üçün onlar xəstəlik daşıyıcısı olmurlar. ÜST-nin ekspertləri bildirirlər ki, xəstəlik nəzi olaraq insandan insana keçə bilər. Amma, praktikada buna rast gəlinməyib.

Bir çox adamda belə bir səhv düşüncə hakimdir ki, xəstəlik yalnız aqressiv və sahibsiz itlərdən keçir. Buna görə də ev itlərinin dişləməsi zamanı çox adam həkimə getməyə ehtiyac duymur. Bu da kökündən yanlış fikirdir. Lakin, praktika çox sakit görünən heyvanlardan da yoluxma olduğunu göstərib. 

Xəstəlik vaxtında aşkar və müalicə edilmədikdə ağır fəsadlar törədir və əksər hallarda ölümlə nəticələnir. Xəstəlikdən qorunmağın ən səmərəli üsulu profilaktikadır – küçə heyvanlarından uzaq durmaq, ev heyvanları ilə ehtiyatlı davranmaq, onları peyvəndləmək lazımdır. 

Hər hansı dişləmə və ya cırmaqlama olduğu halda isə yarabnı dərhal sabunlu su ilə yuyub ən yaxın tibb məntəqəsinə müraciət etmək lazımdır. Vaxtında və düzgün tibbi yardım xəstəliyin qarşısını demək olar bütün hallarda almağa kömək edir. 

Nəzərə alaq ki, son illərdə sahibsiz itlər Bakı ilə yanaşı Sumqayıt, Gəncə, Mingəçevir və Şəki kimi böyük şəhərlərdə də artıb. Sahibsiz heyvanların artması ilə paralel olaraq risk də artır.

Vüqar Yaşaroğlu