Qutular boş qalıb, bina sakinləri zibili yerə atır – VƏTƏNDAŞ ŞİKAYƏTİ - VİDEO

Paytaxtın mərkəzi küçələrinin birində təmizlik mədəniyyətlə bağlı növbəti problem qeydə alınıb. 

Avtosfer.az xəbər verir ki, hadisə şahidi olan vətəndaş baş verənləri video çəkərək sosial şəbəkədə paylaşıb.

Videonu çəkən şəxs bildirib ki, zibil atmaq üçün əraziyə yaxınlaşarkən tullantıların yerə atıldığını görüb. İlk anda zibil qablarının dolu olduğunu düşündüyünü deyən vətəndaş daha sonra qabların qapağını açaraq onların tamamilə boş olduğunu müşahidə edib.

Bu hal şəhər mühitində bəzi sakinlərin ictimai məkanlara qarşı məsuliyyətsiz yanaşdığını bir daha göstərir. Mütəxəssislərin fikrincə, problem təkcə infrastrukturla deyil, eyni zamanda ictimai davranış və şəhər mədəniyyəti ilə bağlıdır. Zibil qablarının mövcud olduğu halda tullantıların yerə atılması həm ətraf mühitin çirklənməsinə, həm də şəhərin estetik görünüşünün pozulmasına səbəb olur.

Qeyd olunur ki, bu cür hallar paytaxtda mütəmadi olaraq müşahidə edilir və vətəndaşlar arasında ekoloji məsuliyyətin artırılmasına ehtiyac olduğunu göstərir. Aidiyyəti qurumlar dəfələrlə zibil qabılarının vaxtında boşaldıldığını və şəhərin mərkəzi hissələrində kifayət qədər konteynerin yerləşdirildiyini bildirsələr də, problem hələ də qalmaqdadır.

Sakinlər isə hesab edirlər ki, təmizlik və nizam-intizam yalnız kommunal xidmətlərin deyil, hər bir vətəndaşın şəxsi məsuliyyətidir.

Eltac Zülfüqaroğlu