Rayon avtovağzallarında sıxlıq yaşanır - VİDEO

Bu gün bayram istirahəti başa çatır və sabahdan etibarən rəsmi iş günüdür. Bu səbəbdən bayramı bölgələrdə keçirənlər Bakıya üz tutmağa başlayıblar. Elə ona görə də bölgələrdəki avtovağzallarda sıxlıq müşahidə edilir.

Avtosfer.az-ın məlumatına görə, bu gündən etibarən Mingəçevir avtovağzalında sərnişin sıxlığı müşahidə edilir. Sıxlıq ehtimalını nəzərə alan avtovağzal rəhbərliyi gücləndirilmiş iş rejimində çalışır. Paytaxta yola düşən sərnişinlər sıxlıq olmasına baxmayaraq, rahat yer tapa bildiklərini deyirlər. Xəttə əlavə avtobusların buraxılması mümkün gərginliyi aradan qaldırıb.

Şəki avtovağzalında da bu gün Bakı və Sumqayıt istiqamətlərinə gedən sərnişinlərin sayı 2-3 dəfə artıq olub.Tələbatı ödəmək üçün avtovağzal rəhbərliyi tərəfindən qabaqlayıcı tədbirlər görülüb. Bakıya gün ərzində 6 iritutumlu avtobus yola salınır. Əlavə olaraq, hər yarım saatdan bir mikroavtobuslar da Bakıya yola düşür.

Sərnişin sıxlığı cənub bölgəsində də müşahidə olunub. Ancaq problemin yaşanmaması üçün xəttə əlavə avtobuslar buraxılıb. Avtovağzal rəhbərliyi tərəfindən süni qiymət artımına da ciddi nəzarət edilir. Bölgələrdəki avtovağzalda sıxlığın sabah da müşahidə ediləcəyi gözlənilir.