Rəşt-Qəzvin dəmir yolu istismara verilib

İranın Gilan vilayətində Rəşt-Qəzvin dəmir yolu istismara verilib. Avtosfer.az-ın Trend-ə istinadən məlumatına görə, İran prezidenti Həsən Ruhaninin iştirakı ilə baş tutan açılış mərasiminə Azərbaycanın iqtisadiyyat naziri Şahin Mustafayev, nəqliyyat, rabitə və yüksək texnologiyalar naziri Ramin Quluzadə, "Azərbaycan Dəmir Yolları" QSC-nin sədri Cavid Qurbanov, eləcə də Pakistan və İraq rəsmiləri qatılıb. Rəştdən ilk qatar Məşhəd istiqamətində yola düşüb. 164 kilometr uzunluğu olan Rəşt-Qəzvin dəmiryolunun inşasına 18,5 trilyon rial (təxminən 440 milyon dollar) vəsait xərclənib. “Şimal-Cənub” Beynəlxalq Nəqliyyat Dəhlizinin əsasını təşkil edən Qəzvin-Rəşt-Astara dəmir yolu yükdaşıma xərclərinin 38 faiz, çatdırılma müddətinin isə 22 gün azalmasına səbəb olacaq ki, bu da iqtisadi baxımdan olduqca əhəmiyyətlidir.