Sərxoş halda elektrikli velosiped idarə etdi CƏRİMƏLƏNDİ

Türkiyənin Bursa şəhərində alkoqollu vəziyyətdə elektrikli velosiped idarə edən qadın sürücü saxlanılıb.

Avtosfer.az xəbər verir ki, yoxlama zamanı onun qanında 2,08 promil spirt olduğu müəyyən edilib. Hadisədən sonra sürücüyə 50 min Türkiyə lirəsi (təxminən 2 100–2 200 manat) məbləğində inzibati cərimə tətbiq edilib.

Bursa İl Polis İdarəsinin Yol Hərəkətinə Nəzarət Şöbəsinin əməkdaşları şəhərin müxtəlif ərazilərində alkoqol reydi keçiriblər. Bursalı Tahir prospektində aparılan yoxlamalar zamanı şübhəli şəkildə hərəkət etdiyi bildirilən elektrikli velosiped saxlanılıb.

Yoxlama zamanı "Evə gedirəm" deyən sürücü Aleyna B.-yə(adlar şərtidir) alkometr testi tətbiq olunub. Testin nəticələrinə əsasən onun 2,08 promil sərxoş vəziyyətdə olduğu məlum olub.

Sürücü alkoqol testindən sonra polis bölməsinə aparılacağını öyrənəndə buna etiraz edib.

"Ora niyə getməliyəm? Motosiklet burada qalsın, açarını götürün. Məni apara bilməzsiniz. Mən nəqliyyat vasitəsini qoyub gedərəm. Polis bölməsinə getməyə məcbur deyiləm. Yazın nə qədər cərimə yazırsınız, amma məni buradan apara bilməzsiniz", – deyə o, polis əməkdaşlarına bildirib.

Eltac Zülfüqaroğlu