Sovet Azərbaycanında 8 Mart təbliğatı - FOTOLAR

8 Mart Beynəlxalq Qadınlar gününə ən çox diqqət yetirən ölkə keçmiş SSRİ olub desək, yanılmarıq. İttifaqın bir subyekti olan Azərbaycan SSR də istisna deyildi. 

Avtosfer.az xəbər verir ki, Sovet Azərbaycanında 8 Mart iş günü hesab edilirdi. Ən əsası isə, bu bayram təbliğat üçün əla fürsət idi. Sovet adamı Klara Setkinlə bağlı məhdud da olsa məlumata malik idi. Təbliğat maşını hər ilin martında Setkini yada saldıqdan sonra yenidən sinfi düşmənlərə yönəlirdi.

Azərbaycan SSR-də 8 mart təbliğatı üçün əsas vasitə plakatlar idi. Bu plakatlar ittifaqın hansısa mətbəəsində milyonlarla nüsxə tirajlanaraq bütün ölkədə yayılırdı. Eyni plakatı Şəkidəki “Şəfəq” kolxozunda da görmək olardı, Ukraynadakı Telman adına sovxozda da. Lakin fərqlər də yox deyildi.

Təbii ki, sovet təbliğatı yerli adət-ənənəni də nəzərə alırdı. Bunu elə elmi kommunizm nəzəriyyəsi də tələb edirdi. Məsələn, istehsalla bağlı plakat bütün sovet respublikalarında istifadə edilə bilərdi. Lakin, “doloy çadra” posterləri yalnız Şərq xalqları, xüsusən də Azərbaycan üçün spesifik idi. Nakam şairimiz Mikayıl Müşfiqin yazdığı kimi:

“Düşün, bil ki, o çadra, bayquş qanadlı çadra
Şərqin qaranlıq, siyah mühitindən toxunmuş”.

Bu plakatlarda təbliğ olunan ideyaların pis və ya yaxşı olmasını qiymətləndirməyi hörmətli oxucunun ixtiyarına buraxıram. Lakin necə olmasından asılı olmayaraq bu, bizim xalqımızın tarixidir. Tarixi isə öyrənmək və hörmətlə yanaşmaq lazımdır.

Vüqar Yaşaroğlu