Tanışının iki "KamAZ"ını ələ keçirən şəxsin məhkəməsi başlayıb

Bakı Ağır Cinayətlər Məhkəməsində dələduzluqda təqsirləndirilən Rəşad Ağayevin cinayət işi üzrə məhkəmə iclası başlayıb. Avtosfer.az-ın "Report"a istinadən xəbərinə görə, hakim Mahmud Ağalarovun sədrliyi ilə keçirilən prosesdə təqsirləndirilən şəxsin vəkili Rəşad Mirmehdizadə vəsatət qaldırıb.

O, müdafiə etdiyi şəxsin ev dustaqlığına buraxılmasını istəyib.

Vəsatət təmin edilməyib.

Daha sonra dövlət ittihamçısı ittiham aktını elan edib. İttihama görə, R.Ağayev tanışı Rəcəb Əliyevdən iki ədəd "KamAZ" markalı yük avtomobili alacağını vəd edib. Hər ikisinin dəyəri 65 min dollar olan avtomobillər baş etibarnamə ilə R.Ağayevin adına keçirilib. Tərəflər arasındakı razılığa əsasən R.Ağayev 130 min dolları Rəcəb Əliyevə hissə-hissə ödəməli imiş. Lakin R.Ağayev adına keçirilən yük avtomobilləri 3-cü şəxsə 136 min dollara satıb və R.Əliyevin pulunu ödəməyib.

Elan olunmuş ittiham üzrə R.Ağayev özünü təqsirli bilməyib.

Məhkəmənin növbəti iclası martın 19-na təyin edilib.