Tbilisidə yol qəzasında ölən və yaralananlar azərbaycanlılar olub

Ötən gün Tbilisidə, mərkəzi Çavçavadze prospektində təcili tibbi yardım maşınının törətdiyi ağır yol qəzasında ölən və yaralanan şəxslərin azərbaycanlılar olduğu məlum olub.

Avtosfer.az-ın “Report”a istinadən verdiyi xəbərə görə, həmin şəxslər tikintidə fəhlə kimi çalışıblar.

Ölən şəxs Bolnisi rayonunun Zol-Göyəc kənd sakini, tikintidə çalışan 27 yaşlı Babək Həsənovdur. O, üç uşaq atası idi.

Qəza nəticəsində xəsarət alan 12 nəfərdən 10-nu azərbaycanlıdır. Onlardan ikisinin vəziyyəti ağır olub, birinin ayağı amputasiya edilib.

Qeyd edək ki, təcili tibbi yardım maşını tikinti ərazisində yerləşən və fəhlələrin olduğu köşkə çırpılıb. Digər yaralanan şəxslər təcili tibbi yardım briqadasının üzvü olub.

Gürcüstan Daxili İşlər Nazirliyi faktla bağlı cinayət işi açıb. Təcili tibbi yardım maşınınn sürücüsü istintaqa cəlb olunub.